Digital Time and Date

Welcome Note

Friday, March 30, 2012

தூக்கத்தின் தந்தை

நன்றாக உறங்குகிறேன்
ஐந்து ஆறு கண்கள் இருப்பதுபோன்ற அலுப்பில்
நான் நன்றாக உறங்குகிறேன்
எனது புதிய கனவின் முகத்தில்
பேய் ஓவியங்களை அள்ளி எறிந்தவர்கள்
தூக்கத்தில் நடக்கும் மனிதர்கள்
எனது வீடு நிறைய நிசி
விளக்கைத் தேடி எடுப்பதென்பது
கண்களை ஒரு துணியினால் கட்டி
விளையாடுவது போலிருக்கு
இங்கே
பேய் ஓவியர்கள் அமர்ந்திருப்பர்
குடும்பக் கதையெல்லாம் சொல்லி
வேட்டைப் பற்களைக் காட்டி சிரிப்பர்
என்று
என் மகனுக்குச் சொன்ன கதைகள்
ஞாபகத்தில் வர
பயந்து கத்திவிட்டேன்
நிசி
பேய் ஓவியர்களின் வர்ணம்
பேய் ஓவியர்களின் வர்ணத்திற்குள்
இறங்கிக் கிடக்கும் நான்
உறக்கத்தில் பலவும் பேசுகிறேன்
உறக்கத்தில் பலவும் பேசுவதாக
முன்பொரு விடியற்காலையில்
மனைவி சொன்னாள்
இன்று
பொழுதுவிடிந்தும்
உறங்கியவாறு கிடக்கிறேன்
எனது பலவருடகால படுக்கையில்
அசதியாக இருக்கும் என நினைத்தோ
அழவேண்டி இருக்கும் என நினைத்தோ
முதுகில் தட்டி
என்னை வழமையாக எழுப்புவது போன்று
எழுப்பவில்லை மனைவி

எனதுடலுக்குள்
தூக்கத்தின் தந்தை குடியேறியிருக்கிறார்
என்பதை எழுந்தவுடன் சொல்ல எண்ணியிருந்தேன்
இப்போது நான்
நீளமாகவும், அகலமாகவும்
வானில் பறக்கிறேன்
என்னுடன் அபூர்வமான பறவைகளும்
பேசிக்கொண்டு வருகின்றன
ஒரு பறவை சொல்லிவருகிறது
உன்னை சந்தூக்கில் வைத்து தூக்கி வருகிறார்கள்
உனக்கு பறப்பது போலிருக்கா?
இதைக் கேட்ட நான்
ஏங்கி அழுகிறேன்
எனது கண்ணீரை பன்னீர் என்று
சொல்லிக் கொண்டுவருகின்றனர்
அக் கூட்டத்தினர்

No comments:

Post a Comment